हिंगोली
हिंगोली जिल्ह्यातील नरसी नामदेव येथील संत नामदेव महाराजांचा पालखी सोहळ्याचे पहिले अश्व रिंगण मंगळवार दिनांक 17 जून रोजी सायंकाळी हिंगोलीच्या रामलीला मैदानावर पार पडले .
12 अश्वांच्या माध्यमातून पार पडलेल्या रिंगण सोहळ्याला हजारो नागरिकांनी गर्दी केली होती . हिंगोली जिल्ह्यातील नरसी येथील संत नामदेव महाराजांचा पालखी पंढरपूरकडे रवाना झाली.
नरसी नामदेव येथून पालखी हिंगोली कडे निघाली घोटा, सवड , केसापूर मार्गे पालखी दुपारी चार वाजण्याच्या सुमारास हिंगोली येथे पोहोचली. हिंगोली येथील महाराजा अग्रसेन चौकात पालखी सोहळ्याचे स्वागत नगरपालिका प्रशासनाच्या वतीने मुख्याधिकारी अरविंद मुंडे यांनी पूजन करून केले .
यावेळी आमदार संतोष बांगर , माजी नगराध्यक्ष दिलीप चव्हाण , संस्थांनचे उपाध्यक्ष भिकाजी कीर्तनकार यांच्यासह अनेक जण उपस्थित होते. टाळ- मृदंगाच्या गजरात , हरिनामाचा जयघोष करत पालखी सोहळा रामलीला मैदानावर पोहोचला.
या ठिकाणी पालखी सोहळ्याचे पहिले रिंगण पार पडले . या पालखी सोहळ्याचा मुक्काम हिंगोलीत झाल्यानंतर बुधवार दिनांक 18 रोजी ही पालखी औंढा नागनाथ मार्गे रवाना होणार आहे.
